Types of life Insurance : ವಿಮೆ ಪಡೆಯುವ ಮೊದಲು ವಿವಿಧ ಬಗೆಯ ವಿಮಾ ಪಾಲಿಸಿಗಳ ಕುರಿತು ತಿಳಿಯುವುದು ಉತ್ತಮ. ಭಾರತದಲ್ಲಿ ಪ್ರಮುಖವಾಗಿ 8 ಬಗೆಯ ವಿಧದ ಜೀವ ವಿಮಾ ಪಾಲಿಸಿಗಳು ಲಭ್ಯವಿದೆ. ವಿಮಾದಾರನು ತನ್ನ ಅಗತ್ಯಕ್ಕೆ ಅನುಗುಣವಾಗಿ ಪಾಲಿಸಿಯನ್ನು ಆಯ್ಕೆ ಮಾಡಿಕೊಳ್ಳಬಹುದು.
ಹಲವು ಕಾರಣಗಳಿಗಾಗಿ ಜೀವವಿಮೆ(life Insurance) ಇರಬೇಕಾಗುತ್ತದೆ. ಅನಿರೀಕ್ಷಿತಗಳಿಂದ ಕೂಡಿರುವ ಜೀವನದಲ್ಲಿ ಎದುರಾಗಬಹುದಾದ ಸಮಸ್ಯೆಗಳಿಂದ ನಮ್ಮನ್ನು ಹಾಗೂ ನಮ್ಮ ಕುಟುಂಬ ಸದಸ್ಯರನ್ನು ರಕ್ಷಿಸಲು ವಿಮಾ ಸುರಕ್ಷೆ ಪಡೆಯುವುದು ಅಗತ್ಯವಾಗಿದೆ. ವಿಮಾ ಯೋಜನೆ ಹೊಂದುವುದರಿಂದ ಆಕಸ್ಮಿಕ ಸಂದರ್ಭಗಳಲ್ಲಿ ಸುರಕ್ಷೆ ದೊರಕುವುದು ಅಷ್ಟೆ ಅಲ್ಲದೆ ಮನಸ್ಸಿಗೆ ನೆಮ್ಮದಿಯೂ ಇರುತ್ತದೆ. ಅದರಲ್ಲೂ ಹಿರಿಯ ನಾಗರಿಕರು ವಿಮೆ ಹೊಂದಿರುವುದು ಅತಿ ಅವಶ್ಯ. ನಿವೃತ್ತ ಜೀವನದಲ್ಲಿ ಹಿರಿಯ ನಾಗರಿಕರು ತಮ್ಮ ಹಾಗೂ ತಮ್ಮ ಕುಟುಂಬಸ್ಥರ ಜವಾಬ್ದಾರಿಯನ್ನು ನಿರ್ವಹಿಸಲು ಪರ್ಯಾಯ ಆದಾಯದ ರೂಪದಲ್ಲಿ ವಿಮೆ ಸಹಾಯ ಮಾಡುತ್ತದೆ.
ಆದರೆ, ಜೀವವಿಮೆಯಲ್ಲಿಯೂ(life Insurance) ಹಲವು ವಿಧಗಳಿವೆ ಎಂಬುದನ್ನು ಅರಿತುಕೊಳ್ಳಬೇಕು. ಕೆಲವು ಪಾಲಿಸಿಗಳು ವಿಮಾ ಸೌಲಭ್ಯದ ಜತೆಗೆ ಉಳಿತಾಯ ಮತ್ತು ಹೂಡಿಕೆಯ ಮೂಲಕ ಆದಾಯ ಪಡೆಯುವ ಆಯ್ಕೆಯನ್ನೂ ನೀಡುತ್ತವೆ. ಇದು ವಿಮಾದಾರನಿಗೆ ಲಾಭಧಾಯಕವೇ ತಾನೆ. ಹೀಗಾಗಿ ವಿಮೆ ಪಡೆಯುವ ಮೊದಲು ವಿವಿಧ ಬಗೆಯ ವಿಮಾ ಪಾಲಿಸಿಗಳ ಕುರಿತು ತಿಳಿಯುವುದು ಉತ್ತಮ. ಭಾರತದಲ್ಲಿ ಪ್ರಮುಖವಾಗಿ 8 ವಿಧದ ಜೀವ ವಿಮಾ ಪಾಲಿಸಿಗಳು ಲಭ್ಯವಿದೆ. ವಿಮಾದಾರನು ತನ್ನ ಅಗತ್ಯಕ್ಕೆ ಅನುಗುಣವಾಗಿ ಪಾಲಿಸಿಯನ್ನು ಆಯ್ಕೆ ಮಾಡಿಕೊಳ್ಳಬಹುದು.
1. ಅವಧಿ ವಿಮಾ ಯೋಜನೆ (Term Insurance) :-
ಈ ಯೋಜನೆಯನ್ನು 10, 20 ಅಥವಾ 30 ವರ್ಷ ಹೀಗೆ ನಿಗದಿತ ಅವಧಿಗೆ ಖರೀದಿಸಬಹುದು. ಈ ಯೋಜನೆಗಳನ್ನು, ಆಯ್ಕೆಮಾಡಿದ ಅವಧಿಗೆ ಕವರೇಜ್ ಲಭ್ಯವಿರುತ್ತದೆ. ಅಂತಹ ಜೀವ ವಿಮಾ ಪಾಲಿಸಿಯಲ್ಲಿ ಯಾವುದೇ ಮೆಚುರಿಟಿ ಪ್ರಯೋಜ ಇರುವುದಿಲ್ಲ. ಈ ಯೋಜನೆಗಳಲ್ಲಿ ಉಳಿತಾಯ ಅಥವಾ ಲಾಭದ ಮಾತೇ ಬರುವುದಿಲ್ಲ. ಆದರೆ, ಜೀವ ವಿಮೆ (life Insurance) ಲಭ್ಯವಿರುತ್ತದೆ. ಹೀಗಾಗಿ, ಅವಧಿ ವಿಮೆಯು ಇತರ ಪಾಲಿಸಿಗಳಿಗೆ ಹೋಲಿಸಿದರೆ ಅಗ್ಗವಾಗಿವೆ. ಟರ್ಮ್ ಇನ್ಶೂರೆನ್ಸ್‌ನಲ್ಲಿ, ಪಾಲಿಸಿ ಚಾಲ್ತಿಯಲ್ಲಿರುವ ಅವಧಿಯಲ್ಲಿ ಪಾಲಿಸಿದಾರ ಮರಣ ಹೊಂದಿದರೆ, ವಿಮಾ ಮೊತ್ತವನ್ನು ಫಲಾನುಭವಿಗೆ ಪಾವತಿಸಲಾಗುತ್ತದೆ.
2. ಮನಿಬ್ಯಾಕ್ ವಿಮಾ ಪಾಲಿಸಿ (Money back life insurance policy) :-
ಇದೂ ಕೂಡ ಒಂದು ರೀತಿ ಎಂಡೋಮೆಂಟ್ ಪಾಲಿಸಿಯಂತೆಯೇ. ಇದರಲ್ಲಿ ಹೂಡಿಕೆ ಮತ್ತು ವಿಮೆಯ ಸಂಯೋಜನೆ ಇದೆ. ಆದರೆ, ಈ ಜೀವ ವಿಮಾ(life Insurance) ಪಾಲಿಸಿಯಲ್ಲಿ, ಬೋನಸ್ ಜತೆಗೆ ವಿಮಾ ಮೊತ್ತವನ್ನು ಪಾಲಿಸಿ ಅವಧಿಯಲ್ಲಿಯೇ ಕಂತುಗಳಲ್ಲಿ ಹಿಂತಿರುಗಿಸಲಾಗುತ್ತದೆ. ಪಾಲಿಸಿಯ ಕೊನೆಯಲ್ಲಿ ಕೊನೆಯ ಕಂತು ಲಭ್ಯವಾಗುತ್ತದೆ. ಪಾಲಿಸಿದಾರನು ಪಾಲಿಸಿ ಅವಧಿಯಲ್ಲಿ ಮರಣಹೊಂದಿದರೆ, ಸಂಪೂರ್ಣ ವಿಮಾ ಮೊತ್ತ ಫಲಾನುಭವಿಗೆ ಸಿಗುತ್ತದೆ. ಆದರೆ, ಈ ಪಾಲಿಸಿಯ ಪ್ರೀಮಿಯಂ ದರ ಅಧಿಕವಾಗಿದೆ.
3. ಎಂಡೋಮೆಂಟ್ ಪಾಲಿಸಿ (endowment life insurance policy) :-
ಈ ರೀತಿಯ ಜೀವ ವಿಮಾ(life Insurance) ಪಾಲಿಸಿಯು ವಿಮೆ ಮತ್ತು ಹೂಡಿಕೆ ಎರಡನ್ನೂ ಹೊಂದಿದೆ. ನಿರ್ದಿಷ್ಟ ಅವಧಿಗೆ ಅಪಾಯದ ರಕ್ಷಣೆಯನ್ನು ಹೊಂದಿದೆ. ಅಲ್ಲದೆ ನಿಗದಿತ ಅವಧಿಯ ಕೊನೆಯಲ್ಲಿ ಬೋನಸ್‌ನೊಂದಿಗೆ ವಿಮಾ ಮೊತ್ತವನ್ನು ಪಾಲಿಸಿದಾರರಿಗೆ ಹಿಂತಿರುಗಿಸಲಾಗುತ್ತದೆ. ಒಂದು ವೇಳೆ ಅವಧಿಗೆ ಮೊದಲೇ ಪಾಲಿಸಿದಾರ ಮೃತಪಟ್ಟರೆ, ಪಾಲಿಸಿಯ ಮೊತ್ತವನ್ನು ಫಲಾನುಭವಿಗೆ ನೀಡಲಾಗುತ್ತದೆ. ಕೆಲವು ಪಾಲಿಸಿಗಳಲ್ಲಿ ಗಂಭೀರ ಅನಾರೋಗ್ಯದ ಸಮಯದಲ್ಲೂ ಹಣ ಪಡೆಯಬಹದು.
4. ಉಳಿತಾಯ ಮತ್ತು ಹೂಡಿಕೆ ಯೋಜನೆಗಳು :-
ಈ ರೀತಿಯ ಜೀವ ವಿಮಾ(life Insurance) ಯೋಜನೆಯು ವಿಮಾದಾರರಿಗೆ ಮತ್ತು ಅವರ ಕುಟುಂಬಕ್ಕೆ ಭವಿಷ್ಯದ ವೆಚ್ಚಗಳಿಗಾಗಿ ಒಂದು ದೊಡ್ಡ ಮೊತ್ತದ ನಿಧಿಯನ್ನು ಖಾತರಿಪಡಿಸುತ್ತದೆ. ಇವು ಅಲ್ಪಾವಧಿ ಮತ್ತು ದೀರ್ಘಾವಧಿಯ ಹಣಕಾಸು ಯೋಜನೆಗಳಿಗೆ ಉತ್ತಮ ಉಳಿತಾಯ ಸಾಧನಗಳಾಗಿವೆ. ಉಳಿತಾಯದ ಜತೆಗೆ ವಿಮಾ ರಕ್ಷಣೆಯ ರೂಪದಲ್ಲಿ ನಿಮ್ಮ ಕುಟುಂಬಕ್ಕೆ ನಿರ್ದಿಷ್ಟ ಮೊತ್ತದ ಭರವಸೆ ನೀಡುತ್ತದೆ.
5. ಯುಲಿಪ್ಸ್ (ulip life insurance plans) :-
ಈ ಯೋಜನೆಯಡಿ ವಿಮಾ ರಕ್ಷಣೆ ಮತ್ತು ಹೂಡಿಕೆ ಎರಡೂ ಸೌಲಭ್ಯಗಳಿವೆ. ಸಾಂಪ್ರದಾಯಿಕ ಎಂಡೋಮೆಂಟ್ ವಿಮಾ ಪಾಲಿಸಿಗಳು ಮತ್ತು ಮನಿಬ್ಯಾಕ್ ಪಾಲಿಸಿಗಳಲ್ಲಿ ನೀವು ಪಡೆಯುವ ಆದಾಯವು ಒಂದು ಮಟ್ಟಿಗೆ ಪೂರ್ವನಿಗದಿತವಾಗಿರುತ್ತವೆ. ಆದರೆ ULIP ಗಳಲ್ಲಿ ಆದಾಯದ ಕುರಿತು ಯಾವುದೇ ಗ್ಯಾರಂಟಿ ಇರುವುದಿಲ್ಲ. ಏಕೆಂದರೆ ಯುಲಿಪ್‌ಗಳಲ್ಲಿ ಹೂಡಿಕೆ ಮಾಡಿದ ಭಾಗವನ್ನು ಬಾಂಡ್‌ಗಳು ಮತ್ತು ಷೇರುಗಳಲ್ಲಿ ಹೂಡಿಕೆ ಮಾಡಲಾಗುತ್ತದೆ. ಮತ್ತು ನೀವು ಮ್ಯೂಚುವಲ್ ಫಂಡ್‌ಗಳಂತಹ ಘಟಕಗಳನ್ನು ಪಡೆಯುತ್ತೀರಿ. ಇಂತಹ ಪರಿಸ್ಥಿತಿಯಲ್ಲಿ, ಆದಾಯವು ಮಾರುಕಟ್ಟೆಯ ಏರಿಳಿತಗಳನ್ನು ಆಧರಿಸಿರುತ್ತದೆ. ಆದಾಗ್ಯೂ, ನಿಮ್ಮ ಹಣವನ್ನು ಎಷ್ಟು ಷೇರುಗಳಲ್ಲಿ ಹೂಡಿಕೆ ಮಾಡಬೇಕು ಮತ್ತು ಎಷ್ಟು ಹಣವನ್ನು ಬಾಂಡ್‌ಗಳಲ್ಲಿ ಹೂಡಿಕೆ ಮಾಡಬೇಕು ಎಂಬುದನ್ನು ನೀವು ನಿರ್ಧರಿಸಬಹುದು.
6. ಜೀವಮಾನದ ಜೀವ ವಿಮೆ (whole life insurance) :-
ಲೈಫ್‌ಲಾಂಗ್‌ ಲೈಫ್ ಇನ್ಶೂರೆನ್ಸ್ ಅಂದರೆ, ಜೀವನಪರ್ಯಂತ ವಿಮಾ ರಕ್ಷಣೆ ಪಡೆಯುತ್ತೀರಿ. ಅಂದರೆ, ಈ ಯೋಜನೆಗೆ ಯಾವುದೇ ನಿಗದಿತ ಅವಧಿ ಇರುವುದಿಲ್ಲ. ಪಾಲಿಸಿದಾರನ ಮರಣದ ನಂತರ, ನಾಮಿನಿಯು ವಿಮೆಯ ಮೊತ್ತ ಪಡೆಯುತ್ತಾರೆ. ಇತರೆ ಜೀವ ವಿಮಾ(life Insurance) ಪಾಲಿಸಿಗಳು ಗರಿಷ್ಠ ವಯಸ್ಸಿನ ಮಿತಿ ಹೊಂದಿರುತ್ತವೆ. ಸಾಮಾನ್ಯವಾಗಿ ವಯೋಮಿತಿ 65-70 ವರ್ಷ ಇರುತ್ತದೆ. ಈ ವಯೋಮಿತಿಯ ಒಳಗೆ ಮೃತಪಟ್ಟರೆ ಮಾತ್ರವೇ ನಾಮಿನಿಗೆ ವಿಮಾ ಮೊತ್ತ ಪಡೆಯಲು ಸಾಧ್ಯವಾಗುತ್ತದೆ. ಆದರೆ, ಲೈಫ್‌ಲಾಂಗ್‌ ಇನ್ಶೂರೆನ್ಸ್ ಅಡಿಯಲ್ಲಿ, ಪಾಲಿಸಿದಾರರು 95 ವರ್ಷ ವಯಸ್ಸಿನಲ್ಲಿ ಮರಣ ಹೊಂದಿದರೂ ನಾಮಿನಿ ವಿಮೆ ಮೊತ್ತವನ್ನು ಕ್ಲೈಮ್ ಮಾಡಬಹುದು. ಆದರೆ, ಈ ಪಾಲಿಸಿಗೆ ಪ್ರೀಮಿಯಂ ದರ ದುಬಾರಿಯಾಗಿದೆ. ಈ ಪಾಲಿಸಿಯಡಿ, ಪಾಲಿಸಿದಾರರು ವಿಮಾ ಮೊತ್ತವನ್ನು ಭಾಗಶಃ ಹಿಂಪಡೆಯುವ ಆಯ್ಕೆಯನ್ನೂ ಹೊಂದಿರುತ್ತಾರೆ. ಇದಲ್ಲದೆ, ಅವರು ಪಾಲಿಸಿಯ ಆಧಾರದಲ್ಲಿ ಸಾಲವನ್ನೂ ಪಡೆಯಬಹದು.
7. ಮಕ್ಕಳ ವಿಮಾ ಪಾಲಿಸಿ :-
ಮಕ್ಕಳ ಶಿಕ್ಷಣ ವೆಚ್ಚ ಮತ್ತು ಇತರ ಅಗತ್ಯಗಳನ್ನು ಗಮನದಲ್ಲಿಟ್ಟುಕೊಂಡು ಈ ಯೋಜನೆಗಳನ್ನು ರೂಪಿಸಲಾಗಿದೆ. ಚೈಲ್ಡ್ ಪ್ಲಾನ್‌ನಲ್ಲಿ, ಪಾಲಿಸಿದಾರ ಮರಣ ಹೊಂದಿದರೆ, ದೊಡ್ಡ ಮೊತ್ತವನ್ನು ಪಾವತಿಸಲಾಗುತ್ತದೆ. ಆದರೆ ಪಾಲಿಸಿಯು ಲ್ಯಾಪ್ಸ್ ಆಗುವುದಿಲ್ಲ. ಎಲ್ಲ ಭವಿಷ್ಯದ ಪ್ರೀಮಿಯಂಗಳನ್ನು ಮನ್ನಾ ಮಾಡಲಾಗುತ್ತದೆ ಮತ್ತು ವಿಮಾ ಕಂಪನಿಯು ಪಾಲಿಸಿದಾರರ ಪರವಾಗಿ ಹೂಡಿಕೆ ಮಾಡುವುದನ್ನು ಮುಂದುವರಿಸುತ್ತದೆ. ಮಗುವಿಗೆ ಒಂದು ನಿರ್ದಿಷ್ಟ ಅವಧಿಗೆ ಹಣ ಸಿಗುತ್ತದೆ.
8. ನಿವೃತ್ತಿ ಯೋಜನೆ :-
ಈ ಯೋಜನೆಯಲ್ಲಿ ಜೀವ ವಿಮಾ(life Insurance) ರಕ್ಷಣೆ ಲಭ್ಯವಿಲ್ಲ. ಇದು ನಿವೃತ್ತಿ ಪರಿಹಾರ ಯೋಜನೆಯಾಗಿದೆ. ಇದರ ಅಡಿಯಲ್ಲಿ, ನೀವು ನಿವೃತ್ತಿ ನಿಧಿಯನ್ನು ನಿರ್ಮಿಸಬಹುದು. ನಿಗದಿತ ಅವಧಿಯ ನಂತರ, ನಿಮಗೆ ಅಥವಾ ನಾಮಿನಿಗೆ ನಿರ್ದಿಷ್ಟ ಮೊತ್ತವನ್ನು ಪಿಂಚಣಿಯಾಗಿ ಪಾವತಿಸಲಾಗುತ್ತದೆ. ಈ ಪಾವತಿಯು ಮಾಸಿಕ, ಅರ್ಧ ವಾರ್ಷಿಕ ಅಥವಾ ವಾರ್ಷಿಕ ಆಧಾರದ ಮೇಲೆ ಪಾವತಿ ಮಾಡಬಹುದು.
